كيك توينكيز مش احسن منك

توينكيز

نوع من " الحلوى " اللي بتتباع في السوبر ماركت , عبارة عن كيكة " إسفنجية " طعمها جميل جداً , والواحد مش بيشبع منها بصراحة

كل ماتضغط عليها , تتحمل ضغطك وترجع تاني لوضعها الطبيعي

وكل ماتضغط عليها , يطلع من جواها كريمة لذيذة .... عذراً لو كان حد بيقرأ الرسالة دي وهو صايم


توينكيز دي بقى مش أحسن منك

ازاي ؟


الناس في أوقات أحزانها وضغوطها ممكن تفلت منها أعصابها , ممكن توجه إليك الإهانة أو الإساءة أو تقول حاجات تزعل

وساعتها , قدامك حل من اتنين


(تشتبك معاهم وترد عليهم بنفس اللي قالوه ( أو أكتر زي ما بتعمل

:وساعتها الوضع هاينفجر , لأن المعادلة

عصبي + عصبي = انفجار

وكدة ممكن يخسرك حاجات كتير , وناس كتير , وعلاقات كويسة ممكن تبوظ بسبب التصرف الطفولي ده

وياما بيوت اتهدت وأسر اتفرقت بسبب المعادلة اللي فوق دي , وبعدها مش بينفع الندم , طالما كل واحد اعتبر دماغه وسيلة مواصلات .... وركبها



الحل التاني , تبقى زي توينكيز ..... اسفنجي , تتحمل الضغوط وتمتص الصدمات , امتص غضب اللي قدامك وعصبيته وتفهم موقفه وظروفه

وزي ما الكيكة دي بتطلع كريمة لما يتضغط عليها .... طلع انت مشاعر كويسة ولطف الجو بهدوءك ..... اللي قدامك ده أكيد بشر وأكيد له أخطاء , وانت كذلك


فيه حاجات كتيرة الإنسان بيعملها وربنا سبحانه وتعالى من حلمه ومغفرته بيتجاوز عننا فيها , انت بقى أحسن من ربنا علشان هو يغفر وانت لأ ؟ هل حقك أغلى من حق ربنا , علشان هو يسامح فيه وانت لأ ؟؟


عمر ما الحلم قلل من الكرامة , وعمر ما العفو خسر حد شئ من مروءته

بل بالعكس ........... الحلم ... سيد الأخلاق

وديننا الإسلام , دين أخلاق

يعني الحلم ... ممكن يوصلك لأعلى مراتب الإيمان


ربنا سبحانه وتعالى ذكرها في القرآن الكريم

وَلَا تَسْتَوِي الْحَسَنَةُ وَلَا السَّيِّئَةُ ادْفَعْ بِالَّتِي هِيَ أَحْسَنُ فَإِذَا الَّذِي بَيْنَكَ وَبَيْنَهُ عَدَاوَةٌ كَأَنَّهُ وَلِيٌّ حَمِيمٌ (34)
سورة فصلت

بس دي حاجة صعبة جداً ... بالغة الصعوبة محتاجة تدريب كبير وصبر علشان تتقنها , والأهم من كدة علشان تفتكرها ساعة حدوث الأزمة , علشان معظمنا عارفها كويس جداً بس بينسى

وعلشان كدة , ربنا سبحانه وتعالى بينها في الآية اللي بعدها

وَمَا يُلَقَّاهَا إِلَّا الَّذِينَ صَبَرُوا وَمَا يُلَقَّاهَا إِلَّا ذُو حَظٍّ عَظِيمٍ (35)

الصبر والتدريب على كدة هايوصلوك لنتيجة ترضيك بإذن الله , وأهم من كدة ... ترضي ربنا


بس ملحوظة أخيرة مهمة جداً جداً

لما تلاقي اللي قدامك بيعتبر حلمك معاه نقطة ضعف فيك , ويبدأ يتلاعب بالنقطة دي , ويتهمك بكل أخطاء الدنيا علشان عارف انك هاتسكت , وهو فاكر ان ده ضعف منك

ساعتها , ماتردش عليه , واستمر في حلمك وامتصاصك للغضب , واحتسب أجرك عند الله , وسيبه يمضي في طريقه , وادعي ان ربنا يهديه للحق ويعرفه مدى غلطه

لأنك لو رديت عليه , ممكن تاخده العزة بالإثم .... ويبقى من الهالكين

فا أحسنله ماتضغطش عليه أكتر .... ماهو مش كل الحلويات توينكيز

ومانتاش عارف ممكن يطلع منه إيه ده كمان


وأحسنلك انت ... لو عايز عفو ربنا ومغفرته ... تعفو
وكمان علشان صحتك , أمراض زي الضغط والسكر بتيجي بسبب العصبية المتبادلة وانك تشيل في نفسك من حد


ولو جالك السكر , مش هاتعرف تاكل توينكيز


من جروب امسك عليك لسانك
https://www.facebook.com/group.php?gid=93779797193&v=wall